فضفضة

بسم الله الرحمن الرحيم

فضفضة

دراعك مرسوم عليه صليب. قورتك عليها زبيبة صلاة. مش ده المهم. لابس روب أبيض أو أسود أو حتى عفريتة زرقا. برده مش ده المهم. إيدك مشققة من الفلاحة في الغيط، أو هدومك مزيتة من تصليح العربيات، أو الشمس هرت نافوخك من القعدة في الشارع عشان تبيع خضار وفاكهة.

يمكن عندك عشر سنين وأول مرة تشوف ثورة قدام عينيك، أو عمرك 30 سنة ومش عارف احنا رايحين على فين، أو حتى عندك خمسين سنة ولسه مش مصدق إن احنا عملنا ثورة بجد. كل ده مش مهم.

المهم إننا كلنا اتنيلنا شربنا من نيلها وجاتلنا الأمراض، وأكلنا من خيرها وجالنا السرطان، ومشينا في شوارعها وموتتنا حوادث الطرق، وركبنا عباراتها وغرقنا في الميا، وركبنا قطوراتها اللي ولعت بينا، واتعلمنا في مدارسها وطلعنا جهلة.

زهقنا وقرفنا واتخنقنا وفقدنا الأمل في إصلاح أي حاجة لأن كل حاجة كانت بمنتهى البساطة "بايظة". وجه يوم 25 يناير – اللي احنا حددنا معاده – على فيس بوك بقا ولا على تويتر مش دي القضية – المهم إن كل المصريين(انفجروا) بعد ما كانوا عايشين وراضيين وساكتين.

طيب وبعدين؟ البلد ما تغيرتش وكل حاجة زي ما هيا؟ احنا رايحين على فين بالظبط؟ مش هقدر أجاوبك، وده لأني فعلا مش عارف الإجابة. وأعتقد إن فيه 80 مليون برده مش عارفين وبيحاولوا يدوروا على الإجابة النموذجية ومش لاقيينها.

كل اللي اقدر أقوله إن في حاجات اتغيرت بعد الثورة ودي ملاحظاتي اللي يمكن تجاوب على بعض الأسئلة:

· إبراهيم عيسى بقى له برنامج اسمه في الميدان بيحاول "يحرر" فيه العقول مستخدما قفشات الأفلام الأبيض وأسود

· عصام العريان بقى بيظهر على التلفزيون والجرايد أكتر من جمال مبارك

· الحزب الوطني بقى تنظيم محظور

· مبارك بيقولوا عيان وبيصيف في شرم الشيخ

· جمال وعلاء ووزارة نظيف عايشين في بورتو طره

· المجلس الأعلى بيحكم البلد ومش هقدر انتقده عشان المحاكمات العسكرية - ربنا يكفينا شرها

· الشرطة موجودة ومش موجودة – دي مش فزورة – ده أمر واقع

· ريم ماجد بتعافر عشان الناس تعرف حقوقها السياسية وبرده مش نافع. جربت كل الطرق ما عدا إنها تعمل شعرها كيرلي.

· السلفيين عملوا حزب سياسي بعد ما كانوا بيحرموا الخروج على الحاكم

· الحاجة الوحيدة اللي متغيرتش بصراحة هي مهنية وحيادية يسري فوده، والكهربا اللي لسه بتقطع في الصيف وطوابير العيش إلخ...

وبالرغم من كل هذه الملاحظات، لسه عندي أمل أن مصر هتتحسن للأفضل. جايز ده يحصل لما نعمل دستور جديد. ويمكن لما ينتخبوا مجلس شعب، واحتمال لما نختار رئيس جديد.

وفي وسط كل الهيصة دي، الليبراليين عايزين الدستور الأول، والإسلاميين عايزين مجلس الشعب الأول ومعاهم 77 في المية من اللي قالوا نعم. وأنا عايز رئيس الجمهورية الأول.

عامة الترتيب مش مهم لأني ملتزم بالديمقراطية، واللي الشعب يختاره أنا موافق عليه. سواء اختاره بقناعة أو تحت اسم الدين أو الاستقرار وماسورة التنمية. المهم إن الشعب يختار وبسرعة، ولو حس إنه غلط هيراجع تاني اختياراته وينفذ اللي شايفه صح.

يبقي غبي اللي يفتكر إن مصر أو المصريين هيقبلوا بالأوضاع القديمة. الحكاية وما فيها إن الشعب طلع كل طاقته من أربع شهور. وهو دلوقتي بياخد نفس عميييييق وبيستجمع قوته. وبيراقب كل الأراجوزات. ولو حس إنه بيتضحك عليه من أي حد. أنا متأكد إنه هينفجر تاني.